الشخص التخين

الشخص التخين

الشخص التخين

الشخص التخين
الشخص التخين

اختلف الناس في تعريف الناس التخينه اللي انا واحد منهم , لكن انا جمعت معظم التعريفات المتداوله

هو الشخص اللي بطنه بتدخل قبله المحاضره , هو الشخص اللي مش بيعوم .. هو بيطفو , هو اللي بيقول ” علي فكره انا مش تخين بس كيرفي ” , هو شخص معندوش في قاموسه كلمه بواقي اكل


التخين بيكره محلات الهدوم  , وبيكون يوم بائس لو راح اشتري لبس .
– التي شيرت دا في منه اكبر
_ اسف حضرتك دا اكبر مقاس .. ساعتها بيحس انه علاء ولي الدين  وانه هيلاقي مقاسه في ورش اللحام عشان يعمله Container  علي مقاسه  وان غزل المحله ممكن يكسب كاس مصر وهو ميلاقيش التي شيرت . مشكله اللبس مش بتقف لحد هنا لو حصل وأمه دعت له قبل ما ينزل ولقي ورشه اللحام دي , يقعد يسأل كل اللي في المحل هو انا باين اني تخين ؟ ارجوك قولي ان مش باين عليا , صديقي انت كدا او كدا تخين فــ إلبس واتبسط

عدو البحر والكلاب حتي كلب البحر كرهه من اسمه

لو نزل البحر بيرفع منسوب المايه في المكان وبيهدد اللي حواليه بالغرق بيلعب في ظاهره المد والجزر , مش مشكلته في العوم مشكلته ان اللي حواليه بيستخدموه عوامه , تبا لأرشميدس وقوانين الطفو المزيفه , غير دا كله انه لو نزل البحر التي شيرت الواسع اللي كان فرحان بيه مش هيكون واسع بعد ما يتبل وكل معالم جسمه هتبان , عشان كدا بيتصور قبل ما ينزل البحر وكمان لو اتصور بعد السباحه هيبعتوا نسخه من الصور لمرتضي منصور بحيث انه يكون ماسك عليه سي دي

بيتجنب الشوارع اللي فيها كلاب  ولو شاف كلب هيقوله عض اسهل يا عم الحج
ودا خلي معظمهم يربي سلاحف في البيت غير مكلفه للمجهود ولا الوقت
بيرميها في البلكونه في ناحيه ويحط لها شويه مايه وخسايه في الناحيه التانيه ويرجع يطمن عليها كل تلت سنين تكون وصلت للأكل ولا ماتت من الجوع بيدخل الحمام مره في اليوم برضه توفيرا للوقت والمجهود , الكرش دا مش من فراغ

من الكلمات المحرمه بالنسباله .. كرشك , ابوك بيأكلك  عشان يدبحك عالعيد , بتاخد مننا الاوكسيجين , واخيرا لما تقف معاه وتقعد تمسك في بطنك قال يعني بتحاول تطلع اي شويه جلد عشان تقول انك تخين ولازم تروح جيم

زي ما زعلته ممكن برضه تصالحه بسهوله , اعزمه عالغدا لوحده او هاتله ساندويتش شاورما اكسترا تشيز وكتر التوميه وبيبسي

من مميزات التخن انه لما يعدي الشارع في حارتين بيقفوا احتراما للنص نقل اللي بتعدي وانا هنا بتكلم عن نفسي , دايما قاعد , مالي مكانه وليه هيبه , لو مع حد من اصحابه عربيه بياخد الكرسي اللي قدام ومحدش هيقعد وراه , و في الاغلب المشوار مش بيكمل بسببه , يتخاف منه في الخناقات وبتاخد من وراه تخفيض في المطاعم

دايما في المطاعم مش بيطلب طلب بكلمه واحده لا دا ليه سطر لواحده ,
عاوز واحد برجر تريبل ووبر اكسترا تشيز وصوص الفلفل الاخضر المزوع في سويسرا واتغسل في هولندا واتجمع هنا في مصر , في الاغلب في اتنين بياخدوا منه الاوردر عشان لو واحد وقعت منه كلمه التاني يلحقه

التخن مش عيب , التخن بس مش صحي , البس واخرج وعوم وخلي كلاب تجري وراك المهم تعيش مبسوط وراضي عن نفسك وشكلك

التعليق من فيس بوك

Like
Like Love Haha Wow Sad Angry
2

تقييم القراء. من فضلك قيـم هذه المقالة :
نجمه واحدهنجمتان3 نجوماربع نجومخمس نجوم6 نجوم7 نجوم (1 صوت, بتقييم: 5.00 من 7)
Loading...


عن الكاتب

Ahmed Farahat