قالولنا بس دول شحاتين

قالولنا بس دول شحاتين
Poor, Child

ماشيين في زحمه شوارعنا نبص لساعتنا او موبايلاتنا و ممكن كمان مكالمه مستعجله عشان اتأخرت علي معادك يعني ببساطه ماشيين  في الشوارع مشغولين في حياتنا بنسبه لا تقل عن 70% مثلا وده الطبيعي مفيش حاجه غريبه لحد دلوقتي

دي صوره بسيطه بتكرر كل يوم مع كل واحد فينا او مع معظمنا

بس مفيش مره نسينا مواعيدنا والتزامتنا وبصينا جنبنا يعني مشفناش اللي حياتهم مجرد نومه في الشارع  بس لحظه واحده أنا هنا مش بتكلم عن اللي واخدين مساعده الناس ليهم علي أنها مهنه بتكلم عن المحتاجين بجد … طيب وازاي المفروض نفرق بينهم


هو حضراتنا مش مطالبين نفرق بينهم اصلا

لو قريتوا مقالتي اللي فاتت ” بيئه بس مش أوي ” هتلاقونا اتفقنا اننا منصدرش أحكام من غير ما نعرف بس رغم كل ده أحنا مطالبين بالرحمه

مش بقولك طلعي كل اللي في جيبك عشان تساعدي اللي شفتيهم في الشارع بس هو انتي عارفه عملتي ايه لما بنتك الصغيره سألتك بكل براءه وقت لما شافت واحده عينيها مقفوله قاعده علي الرصيف

  •  ماما هي طنط اللي في الشارع دي عينيها عامله كده ليه

فكان ردك دي عامله كده عشان الناس تديها فلوس يعني بتمثل وسحبتي البنت ناحيتك وهي عينيها مليانه مليون سؤال و سؤال

عارفه الموقف ده ممكن يعمل ايه

ممكن يقتل الرحمه جواها يخلي قلبها يقسي عليكي قبل الناس الغريبه

كان ممكن تغيري كلامك لحاجه زي ممكن تكون تعبانه في عينيها  أو أحنا منعرفش فمينفعش نحكم عليها

الرد اختلافه بسيط بس تأثيره في بنتك هيكون مختلف تماما

الجملتين كلام مكلفكيش حاجه بس الكلام ده بيصنع شخصيات او بيهدم

عارفين لاول مره في حياتي اشوف مشهد يأثر فيا للدرجه دي

ماشيه متضايقه بعد مشوار طويل وجايز كارهه نفسي عشان اشوف ولد سنه ميجيش 18 سنه ومكانه في الشارع بياكل عيش غالبا حاف وحاطط حته جبنه قدامه وبيعزم علي قطه شارع وهي في قمه الدهشه وانا واقفه ابصلهم متنحه لمده 5 دقايق مثلا ساعتها فعلا كنت محتاجه أن يكون في كاميرا ف ايدي

ممكن نكون شفنا المشهد ده كتير في صور علي الفيسبوك  او غيره بس لما تشوفه قدامه بيديك احساس تاني

من الاخر كأنك غسلت عينك وطهرت روحك

رفعت عيني بعدها لقيتني ببص للدنيا باحتقار

طيب انا ليه بحكي المشهد ده لاني شفت ان اللي معهوش يقدر يدي ودي كانت اول مره اشوفه وأحضره كده مش مجرد صوره

ومش بطلب منكم زي ما قلت تطلعوا كل اللي في جيوبكم بس احنا برضه منعرفش ايه اللي وصل الناس دي لكده

فأرجوكم بلاش أحكام

وبلاش كلمه شحاتين أو ممثلين لانها بتجرح أو لاننا بقينا ماشيين بقاعده التعميم اللي غالبا بتظلم ناس كتير وفي نفس الوقت بنظلم بيها نفسنا

عارفين بصه مليانه رحمه أو كلمه بسيطه زي الله يسهلك ويرزقك مثلا ده يعني لو مش عايز تساعد بحاجه ماديه فساعد بحاجه معنويه ده عشان تفضل ارواحنا مبسوطه وسعيده وبلاش تعلموا ولادكم واطفالكم القسوه والظلم والاكام المسبقه

كفايه علينا جيلنا اللي مليان امراض نفسيه وعقد بلاش نعمل جيل مليان حاجات أوحش

كفايه قسوه وكفايه احكام مسبقه

التعليق من فيس بوك

Like
Like Love Haha Wow Sad Angry
81

تقييم القراء. من فضلك قيـم هذه المقالة :
نجمه واحدهنجمتان3 نجوماربع نجومخمس نجوم6 نجوم7 نجوم (3 صوت, بتقييم: 6.33 من 7)
Loading...


عن الكاتب

ندى حسن علام