مسرحية من فصل واحد بعنوان صراع


مسرحية من فصل واحد بعنوان صراع

مسرحية من فصل واحد بعنوان صراع

جلس حازم وهايم على ضفة نهر النيل في يوم ربيعي معتدل الحرارة .. وبينما حازم يرتشف عصير الليمون بتلذذ مستفز .. كان هايم ينظر إليه شذراً قائلا :

هايم : على فكرة انت أبرد من العصير اللي بتشربه
حازم ساخراً : ليه يا قمر
هايم : شوف بتستهزأ بمشكلتي ازاي
حازم : أعملك ايه إذا كنت مش عايز تنزل تعيش معانا على الأرض
هايم : ما متنيل قاعد معاك اهو
حازم : انزل بمشاعرك على أرض الواقع دلوقتي احسن ما تنزل على جدور رقبتك بعدين
هايم : أنا مش هنزل على أرض الواقع بمشاعري .. أنا هخلي الواقع هو اللي يطلع لمشاعري .. لازم أخلي الواقع يكون أكتر شاعرية بحبي لمريم
حازم : طيب ايه المشكلة بقى
هايم : المشكلة ان أهلي غرقانيين في برميل الواقعية اللي سيادتك غرقان فيه .. ورافضين فكرة ان ارتبط بواحدة أقل مني اجتماعيا وثقافياً وماديا .. وبيقوللي مش هينفع ترتبط بها لأنها أقل منك في كل حاجة
حازم : طيب ما أهلك بيتكلموا صح
هايم : يا عم حازم حس بيا الهي تحس بيك مقطورة
حازم : تفتكر لو الوضع كان معكوس وانت اللي كنت أقل من مريم في كل حاجة … هي أو أهلها كانوا هيوافقوا عليك؟
هايم : مريم بتحبني وأكيد كانت هتوافق .. أهلها احتمال كبير ماكنوش يوافقوا
حازم : طيب ليه أهلك وأهلها يرفضوا حد أقل من مستوى ابنهم أو بنتهم في كل حاجة … مش يمكن هم بيتكلموا صح
هايم : لأ … عشان همه مابيحبوش
حازم : لو انت مخلف بنت وواحد اتقدملها أقل منها في كل حاجة … توافق يتجوزوا ؟
هايم : لو بيحبوا بعض بجد يتجوزوا
حازم : لما يتجوزوا الفروق بينهم اللي في كل حاجة واحدة واحدة هتظهر … ومع الوقت المشاكل هتبان وهينفصلوا
هايم : يبقى ماكنوش بيحبوا بعض بجد
حازم : اللي مطول بالي عليك انك صاحبي … بس ده مايمنعش ان دي آخر قاعدة ليا معاك
هايم : بس ياله … بقولك ايه انت لازم تكلم أهلي عشان يوافقوا على ارتباطي بمريم
حازم : عنيا .. أنا هروح لأهلك واقولهم انتوا صح
هايم : انت حيوان على فكرة
حازم : يا بني القصة بتاعتك انت ومريم اتهرست في 300 ألف واقع قبل كده
هايم : حبنا لبعض هو اللي هيهرس الواقع المرة دي
حازم : انت ايه اللي يضمنلك انك مش هتكون من ضمن القاعدة اللي ملهاش تقريباً استثناءات ؟
هايم : شفت اديك بتقول استثناءات .. أنا هكون من ضمن الاستثناءات دي
حازم : انت ياض بتسقط نص الكلام ليه .. أنا قولت ايه اللي يضمنلك انك مش هتكون من ضمن القاعدة ؟
هايم : حبنا لبعض
حازم : يعني دلوقتي تاريخ الناس اللي لبست في الحيطة والفروق الفردية وخبرة الناس اللي سبقونا والواقع بيقول الجوازة دي مش متكافئة .. و سيادتك عايز بحبك لمريم تنط فوق ده كله .. ربنا يوفقك في أقرب فرصة
هايم : هتكلم أهلي
حازم : لأ
هايم : يا عم بقى
حازم : تعرف ان المخ بيلخبط كيمياء الدماغ .. ده مش كلامي ده كلام الأبحاث العلمية
هايم : ازاي يا عالم
حازم : العلم اثبت ان الحب بيؤثر علي مراكز الدماغ الخاصة بالمنطق .. وده اللي سيادتك واقع فيه دوقتي .. يعني سيادتك كأنك واخد جرعة مخدرات بتأثر علي ادراكك للواقع .. لما مفعول الجرعة يروح هتشوف الواقع بمنتهى الوضوح .. بس هتشوفه بعد الجواز
هايم : وايه اللي هيخليني اشوفه بعد الجواز .. ما احنا هنفضل نحب بعض.. يعني بالمنطق العلمي بتاعك هنفضل متخدرين عالطول
حازم : المنطق العلمي مش بتاع حد .. المنطق ده بيسري على الكل بما فيهم سيادتك .. يا راجل ده الحب بيؤثر على رؤيتك لحبيبتك
هايم : اه يعني تبقى في عيني نانسي عجرم وفي عين الناس زينات صدقي
حازم : مش للدرجة دي .. بس انت بتبقى شايفها جميلة .. بس بعد الجواز هتشوفها زي ما الناس شايفاها
هايم : أنا هفضل شايف مريم جميلة طول العمر
حازم : مريم هتفضل جميلة طول العمر عشان هي حلوة مش عشان انت شايفها جميلة
هايم : انت بتعاكسها ياض قدامي
حازم : مريم لو كانت وحشة كنت هقولك انها وحشة .. أنا عايزك تفهم حاجة
هايم : ايه
حازم : التكافؤ مهم جداً في الجواز .. معروفة دي
هايم : بس الحب اهم من التكافؤ
حازم : التكافؤ أوقع من الحب
هايم : أم الواقعية اللي انت عايش فيها
حازم : اللي كلنا عايشين فيها
هايم : يا عم عيش انت في الواقع بتاعك وسيبني في الواقع بتاعي
حازم : مع الوقت هتفهم اننا عايشين في واقع واحد بينطبق على الكل
هايم : انت ليه مش عايز تساعدني
حازم : المفروض السؤال ده يكون.. انت ليه مش عايز تساعد نفسك
هايم : ايه السؤال ده ؟
حازم: يا بني انا مش ضد الجوازة دي .. بس انا يعز عليا اني اشوفك مش مستريح في جوازك
هايم : يعني انت شفتني اتجوزت
حازم : أنا مش ضد انك تتجوز اللي بتحبها بس ضد انك تتجوز مريم
هايم : مش فاهم
حازم : لازم الجواز يكون خلطة متوازنة ما بين الحب والتكافؤ في حاجات كتير .. لا الجواز يكون عشان بتحبوا بعض بس من غير تكافؤ .. ولا تكونوا متكافئين في كل حاجة بس مابتحبوش بعض
هايم : يعني انت عايز اكون بحب مريم وفي نفس الوقت في تكافؤ بيني وبينها
حازم : مضبوط
هايم : طيب انا ممكن اعليها في الحاجات اللي مش متكافئة معايا فيها
حازم : انت كده ابتديت تقلش
هايم : لا بجد
حازم : طيب مادياً ممكن نتغاضى .. اجتماعياً هيبقى صعب .. ثقافياً يبقى انت بتهجص والكلام معاك مامنوش رجا
هايم : ليه بس
حازم :عارف.. انت حابب فكر حب مريم لك .. مبسوط بالجو ده
هايم : شفت مين فينا اللي بيقلش دلوقتي
حازم : انت حابب فكرة ان حد يعبرك .. وتقفشوا على بعض وتتعذبوا وتمسكوا ايد بعض .. حابب فكرة الحب و دي مشكلة تانية
هايم : أنا من ساعة ما قعدت معاك وأنا مشاكلي كترت
حازم : تعالى نفترض انك مارتبطتش بمريم لأي سبب .. وحبيت واحدة في المستقبل متكافئة معاك في حاجات كتير وارتبطوا ببعض .. تفتكر هتبص على فترة ارتباطك بمريم ازاي
هايم : معرفش يا حازم .. معرفش
حازم : هقولك مادام بتستعبط.. لو انت محترم هتقول انك ماكنتش مقيم التجربة صح . اما لو كنت مهزأ وده أكيد .. هتقول انه كان طيش شباب
هايم : يعني انت عايز مني ايه دلوقتي
حازم : مش أكتر من انك تفكر في اللي أنا قولته .. في حاجة كمان عايزها منك سلامتك العقلية والعاطفية .. يا هايم

قد يعجبك أيضا ..  كيف املك قلب زوجتي

انتهت

التعليق من فيس بوك

Please complete the required fields.
اختر سبب التبليغ واكتب تفاصيلة .. ويمكنك ايضا التبليغ بشكل اسرع عن طريق صفحتنا فى فيس بوك



Like
Like Love Haha Wow Sad Angry
1

تقييم القراء. من فضلك قيـم هذه المقالة :
نجمه واحدهنجمتان3 نجوماربع نجومخمس نجوم6 نجوم7 نجوم (1 صوت, بتقييم: 7.00 من 7)
Loading...


عن الكاتب

زائر
عضويه غير حقيقيه تنسب اليها المحتوى الذى يضيفه الزوار
  • تواصل مع زائر: