بيئه بس مش اوي


بيئه بس مش اوي
environmental-protection-683437_640

كخريجه من قسم علوم بيئه هتصدقوني لو قلتلكم أني سمعت هو أنتي بيئه مصحوبه بضحكه سخيفه في أحيان كتيره يعني سمعتها بنبره مليانه سخريه … الموضوع كان بيضايقني في الاول بس بعد كده بشويه نظرتي أتغيرت

مش أنا بس ولا كل اللي زيي او طلبه قسم علم الحيوان اللي متظبطين زيينا


أحنا كمجتمع بقي عندنا سياسه السخريه مش من مشاكلنا بس لا من بعضنا كمان

بس مسيرنا نتغير

عموما أعتقد أنكم هتصدقوني لما أقولكم أن كلمه بيئه دي غيرت حياتي

من واحده ماشيه وراء أحلام بيحددها المجتمع ليها لواحده بتفكر بطريقه مختلفه ببساطه أتعلمت أني محكمش علي حاجه الا لما اجربها ولو معنديش شجاعه اجرب يبقي اسكت أحسن

يعني يا تجرب و تحكم يا تسكت وتبعد

طيب انا بقولكم الكلام ده ليه

عشان نفسي من الاخر اعمل حاجه مفيده باللي اتعلمته ده .. يعني نفسي أوصل لحاجه بكلامي ده

مش يمكن حد واحد يقرأ كلامي و يؤمن أن لما كان بيعمم ويقول يا بيئه غلط  في حق ناس كتير حلوه

ف لو عجبتكم الفكره أسمحولي أدخلكم عالمي عشان تعرفوا ان دنيتي حلوه زيكم وأني حبيت دراستي و أستمتعت بيها أكتر من طلاب انتوا ممكن تقولوا عليهم كليات يحلم بيها الجميع و عشان المره الجايه اللي تسمعوا فيها كلمه قسم علوم بيئه متنادوش صاحبها بالبيئه

طيب وده هيكون أزاي

ايه رائيكم في سلسله مقالات نتكلم فيها عن يعني ايه بيئه و أيه اللي وراء الكلمه دي حاجه كبيره ومهمه مش مجرد كلمه نستخدمها كمجال للسخريه

والمقالات دي هتكون ازاي

خلوني اقولكم أني من عشاق الفصحي بس في نفس الوقت انا زيي زي ناس كتير اتعودت أن لما حد يقولي معلومه علميه أو يشرحلي حاجه يجبهالي بالعاميه من الاخر يبسطهالي ودي نتاج منظومه تعليم مصريه بحته

فلو عجبتكم الفكره فالمقالات هتكون بالعاميه كأننا بنرغي سوا وندردش كده

وحيث أني بقالي كتير أوي برغي في الموضوع ده

خلوني اجيب لكم ملخص الكام حاجه اللي اتعلمتها في نقط مش هتكون كفايه بس هحاول أعمل اللي عليا ويكون كفايه علي أول مقاله ليا هنا

أولا : حياتنا متوصله ببعضها بطريقه ما زي الدايره كده ببساطه

يعني الكيس البلاستيك اللي انت رميته في الشارع ده ليه دخل كبير ف موت حيوان بحري كالسلحفاه البحريه

ثانيا : دي قلتها من شويه أننا مينفعش نحكم علي أي حاجه منغير ما يبقي عندنا درايه كافيه بكل أبعادها

يعني مينفعش أقول أنا هخلص من الورقتين دول بأني أحرقهم لأنهم ببساطه هيرجعولك بطريقه تانيه ممكن تكون أسؤا وده بالمناسبه جزء من الدايره شفتوا ازاي كله متصل ببعضه

ولحد المقاله الجايه أرجوكم بلاش الاحكام بدون سابق معرفه

 

التعليق من فيس بوك

Like
Like Love Haha Wow Sad Angry
5

تقييم القراء. من فضلك قيـم هذه المقالة :
نجمه واحدهنجمتان3 نجوماربع نجومخمس نجوم6 نجوم7 نجوم (لم يتم التقييم من قبل ..كن أول من يقيم هذه المقالة)
Loading...


عن الكاتب

زائر
عضويه غير حقيقيه تنسب اليها المحتوى الذى يضيفه الزوار
  • تواصل مع زائر: